" من أول ما اتجوزته وهو مش بيتعامل معايا غير بالضرب، إيده سابقة لسانه كان معيشنى فى رعب بخاف اتكلم أو أنسي أجهز حاجة من طلباته، عشان ميضربنيش لأنى ضربه غبي وبيسيب كدمات فى وشي وجسمى، لكن على الرغم من كدا وأنا بعمل كل حاجة بيحتاجها إلا إنه بيتحجج على ايه ويضربنى ويقول لى الست مش بتخاف غير بالضرب عشان متعملش حاجة غلط، لحد آخر مرة ضربنى فيها كنت حامل فى الرابع ودا لأنى طلبت منه أروح عند دكتور كويس بدل العيادات الصحية، لحد ما موت ابنى منه لله".. كلمات موجعة نطقت بها رقية وهى داخل محكمة الأسرة لرفع دعوى خلع من زوجها بعد 9 شهور من الزواج مبررة استحالة العشرة معه.
وقالت الزوجة فى مستهل حديثها مع "أهل مصر": أنا اتجوزت من 9 شهور جواز صالونات من واحد عمرى ما أعرفه قبل كدا وأهله عايشين فى محافظة تانية لكن هو عايش هنا فى القاهرة، ومثل علينا الطبية والأخلاق وهو جاى يتقدم وانه بيشتغل فى الاستيراد والتصدير، وأهلى وافقوا عليه لما لاقوه كويس قدامهم وانه شارينى وهو كان شافنى مرة واحدة فى فرح، وكان نفسي يفضل كدا بالأخلاق اللى جه اتقدم ليا بيها لكن للأسف بمجرد الجواز بدأ يظهر على حقيقته وانه إنسان مريض مش بيعرف يتعامل غير بالضرب والإهانة على أى سبب حتى لو تافه، ولما بيضرب بينسي انى ست ضعيفة قدامه، وكأنه بيضرب واحد صاحبه ويعمل كدمات فى كل حته فى جسمي وخاصة وشي لأنه بيضربنى بالبونيات.
وتابعت حديثها قائلة: كنت بستحمل وبحاول اتجنب أى خلاف بيننا وآجى على نفسي لأنى حملت منه وكان نفسي ابنى يعيش حياة مستقرة، لكن هو مافيش فايدة حتى وأنا حامل بيضربنى، لدرجة انى طلبت منه أكشف عند دكتور خاص غالى شوية لأنه كان مخلينى أتابع فى العيادات الصحية وأنا كنت تعبانه أوى اتفاجئت انه بيضربنى ويشتمني وانى مش بحس بظروفه على الرغم انه معاه فلوس بس هو بيحب يوفر، وطبعا فاض بيا ولأول مرة أرد عليه فكمل ضرب فيا لحد ما نزفت ودراعى اتكسر وروحت المستشفى وهو قالهم انى وقعت من على السلم عشان نفسه، وفعلا أنا مقدرتش انطق خوفا منه لكن طلبت منه الطلاق ورفض فرفعت عليه دعوى الخلع ومازالت الدعوى منظورة أمام القضاء.
تابعوا آخر أهل مصر على Google News
