"أول ما اتقدم ليا كان اختارنى بإرداته، ومحدش غصبه عليا، وطبيعى إنى لما أحمل وأخلف جسمى يزيد شوية لكن هو متقبلش دا وكان شايف إنى بعمل رجيم عشان خاطره، وراح عرف عليا واحدة مطلقة وقرر يتجوزها عليا، وعايزنى أعيش معاه ورافض يطلقني".. جاءت هذه الكلمات على لسان "سماح" وهى داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.
وقالت سماح فى حديثها لـ"أهل مصر": "اتقدم ليا وأنا فى سنة رابعه جامعة وجسمى كان راشيق ومتناسق، وهو بيشتغل فى شركة وميسور الحال ماديا، وحصل بينا قبول من أول يوم اتقابلنا فيه، واتجوزنا بعد فترة خطوبة استمرت ٥ شهور، وكانت الحياة أول الجواز مستقرة إلى حد كبير على الرغم من تعليقاته الكتير على أبسط الأشياء فى جسمى، عايزنى أبقي كامله مافيش ولا عيب، وميعرفش إنى مافيش إنسان كامل، كل واحد فيه عيوب، وأنا الحمدلله على قدر عالى من الجمال لكن لما حملت وخلفت ظهر فى جسمى شوية ترهلات، وابتديت أعمل رجيم عشان أحاول أرجع زى الأول وهو كان شايف بعينه، لكن مرحمش نفسيتى وبدأ ينتقدنى على جسمى وإنه بقي مترهل ومش جذاب".
وتابعت حديثها قائلة: "كنت بحاول بكل الطرق انزل من وزنى لحد الدكتور قال بعد فترة الرضاعة أفضل، لكن جوزى فى الفترة أهملنى وبدأ يتعرف على واحدة مطلقة من ورايا واتكلموا فى كل حاجة لحد ما العلاقة اتطورت واتفقوا على الجواز واتصدمت لما قالى إنه هيتجوز وطلبت منه يطلقنى لكن رفض فرفعت عليه دعوى خلع بمحكمة الأسرة ومازالت الدعوى منظورة أمام القضاء".
تابعوا آخر أهل مصر على Google News
