آمال تطلب الخلع: بيحلم بـ ليلى وينادي اسمها وهو نايم

"زهقت ومش قادرة اتحمل كل ليلة يحلم بواحدة اسمها ليلي، واكتشفت انها خطيبته القديمة وسابته واتجوزنى أنا، وكمان عرفت انه بيحاول يكلمها، دا غير طريقته معايا فى الكلام على طول ساكت معظم الوقت ويلعب فى التليفون لحد ما حسيت انه مجبر عليا فعلا، واللى أكد لى أحلامه وليلي اللى بينطق اسمها خلانى لازم أبعد".. جاءت هذه الكلمات على لسان "آمال" وهى داخل محكمة الأسرة لرفع دعوى خلع من زوجها بعد عام واحد فقط من الزواج مبررة استحالة العشرة معه.

وقالت الزوجة فى مستهل حديثها مع "أهل مصر": اتجوزت من سنة واحدة وكان جواز صالونات، ورضيت بنصيبي لما حسيت براحة نفسية، ارتحت أكتر وكانت فترة الخطوبة قصيرة ومقدرتش أعرف عنه كتير، لكن كان قايل انه خطب قبلي واحدة وسابها ومتكلمش عنها فى أى حاجة، لحد ما اتجوزنا ومحستش بأى راحة نفسية لأنى كنت حاسة انه مجبر عليا، مكنش بيتكلم معايا، دايما فاتح التليفون بيلعب أو ساكت وكأنه بيفكر فى حاجة؛ لحد ما بقيت اسمعه أحيانا بالليل بيحلم ويردد اسم ليلي".

وتابعت حديثها قائلة: اتخانقت معاه لكن أنكر انه يعرف واحدة اسمها ليلي، وانه مش فاكر انه حلم بحاجة، وبدأ الشك يدخل جوة قلبي لحد ما عرفت انه اسم خطيبته القديمة، واكتشفت انه بيحاول يكلمها على الفيس بوك رغم انها اتجوزت، وطلبت منه الطلاق ورفض فرفعت دعوى الخلع، ومازالت الدعوى منظورة أمام القضاء.