"عمري ما كنت أتخيل إن جوزي يقولي أنا متجوزك جبر خواطر لأهلي، لكن عمري ما فكرت فيكي ولا حبيتك وحياتنا هتفضل كدا عجبك تعيش موافق مش عاجبك هسيبك معلقة لحد ما تتنازلي عن قائمة المنقولات الزوجية، دا غير معاملته ليا وتحكماته في كل حاجة تخصني" جاءت هذه الكلمات على لسان ميادة وهي داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه بسبب معاملته القاسية معها.
وروت الزوجة قصتها لـ "أهل مصر": اتجوزت من سنة ونص جواز صالونات، وكان مناسب ليا في كل الظروف ماديا واجتماعيا، وزي أي بنت وافقت على الجواز منه بعد فترة خطبة استمرت 5 شهور وكانت معاملته معايا طبيعية كأي زوج، في الشهور الأولى وكان نفسي يفضل معايا كدا طول العمر، لكن لقيته بيبعد عنى ويتجاهل الكلام معايا لحد ما بقيت أحس أنه مجبر عليا، وكمان أهله ليحبوني أكتر منه واكتشفت أنه بيكلم بنات على مواقع "الفيس بوك" وزمايله في الشغل، ولا بيفكر فيا ولا في مشاعري نهائيا وكان لازم أواجه عشان أعرف اتجوزني ليه.
وتابعت حديثها قائلة، كنت هتجنن لحد ما قررت اني أواجه وكنت فاكرة إنه هيكذب عليا لكن قال الحقيقة إنه مش بيحبني واتجوزني جبر خواطر عشان أهله متمسكين بيا، واني من عيلة زيه في المستوى المادي، وإنه عمره ما حبني ولا حاسس أنه هيحبني وعايرني أعيش معاه كدا وهو يعيش حياته لحد ما يلاقي الإنسانة اللي هيحبها، وطبعا رفضت وطلبت منه يطلقني اشترط إني اتنازل عن قائمة المنقولات الزوجية مقابل الطلاق عشان كدا قررت ارفع دعوى الخلع ودعوى بالمنقولات الزوجية ومنتظرة أولى الجلسات.
تابعوا آخر أهل مصر على Google News
