"من أول ما اتجوزنا وهو إنسان كسول مش بيحب يشتغل طول النهار نايم ويصحي بالليل يفتح المحل كام ساعة ونكون كل الدنيا نايمة يعنى لا بيشترى ولا يبع ، وأنا عايشة على الفلوس اللى باخدها من والدتى، وربنا رزقنى بطفلة محتاجة جلسات نطق عشان تتكلم كويس، ولما طلبت منه فى مرة فلوس الجلسة قال مش معايا، ولأول مرة طلبت من بنتى إنها هى اللى تقوله يمكن يحن ويحس بيها لكن اتفاجت أنه اتعدى عليها بالضرب لحد ما نزفت".. جاءت هذه الكلمات على لسان "أسماء" داخل محكمة الأسرة لرفع دعوى نفقة من زوجها مبررة استحالة العشرة معه.
وقالت الزوجة في مستهل حديثها لـ"أهل مصر": "اتجوزت من 6 سنين جواز صالونات على الرغم إنى والدتى كانت شايفه مش مناسب نهائيًا ليا وخاصة إنى البنت الوحيدة ووالدى توفي وكان نفسها تجوزنى وتحس إنى مرتاحه لكن أنا اقنعتها بالجوازه، وأنه شكل كويس وفعلا اتجوزنا وياريتنى سمعت كلامها، ومن أول ما اتجوزت وأنا عايشة في عذاب بسبب كسله في الشغل وعدم تحمله مسئولية بيت، لحد ما فكرت في الطلاق أكتر من مرة لكن حملت بعد الجواز، وقولت هتحمل عشان بنتى ، وشاء القدر إنها تكون مريضة وبتحتاج علاج عشان تعرف تتكلم، وحتى لما وصلت 4 سنين كانت يدوب بتقول كلمة بالعافية".
وتابعت: "فعلا كنت بروح اكشف عليها أنا لحد ما بعت كل دهبي وصرفته غير فلوس والدتى واللى شايلنا فى كل حاجة، لحد ما قررت إنى أطلب منه فلوس لجلسة بنتى وإنه أبوها ولازم يشارك في مصاريف علاجها، اتفاجت إنه بيرفض نهائيا دا غير التنمر اللى وجه للطفلة، فقولت للطفلة حاولى تتطلبي منه فلوس ويدوب كلمه فلوس اللى عرفت تنطقها اتفاجت أنه بيضربها لحد ما نزفت من كتر الضرب وجريت بيها على والدتى ومسألش فينا عشان كدا قررت أرفع دعوى نفقة ومازالت الدعوى منظورة أمام القضاء.
تابعوا آخر أهل مصر على Google News
