شهدت محاكم الأسرة العديد من قضايا الخلع والطلاق والنشوز خلال هذا الأسبوع، باختلاف الأسباب والدوافع، أبطال هذه القصص أشخاص عاديون مثلنا ولكن كتب لهم القدر أن تكتب أسماءهم فى سجلات القضاء، لذلك ترصد 'أهل مصر' بعض هذه القضايا خلال هذا الأسبوع.
نسمة لقاضي الأسرة: متجوز عليا برا مصر وجايبني أخدم أهله
'سافر بعد جوازنا بكام شهر بس وبقاله سنة ونص غايب وأنا قاعده فى شقة فى بيت أهله وبخدمهم وشايله أمه واخواته لحد ما اتفاجئت أنه متجوز فى السفر وأهله عارفين وبيكلموه هو ومراته وبنته، وأنا هنا اتجوزنى وسابنى خدامه ليهم ولما عرفت وواجهتهم ورفضت أنى أخدمهم تانى لحد ما جوزى يرجع طردونى من الشقة ورفضوا حتى أنى أخد حقي'.. جاءت هذه الكلمات على لسان نسمة وهى داخل محكمة الأسرة لرفع دعوى بقائمة المنقولات الزوجية من زوجها بعد عامين من الزواج.
وقالت الزوجة فى مستهل حديثها مع 'أهل مصر': 'هو كان بيسافر ديما بسبب شغله ولما اتقدم ليا شرط أنى هعيش فى بيت أهله وهو هينزل كل سنة مرة شهرين هيقضيهم معايا، وانى مينفعش ياخدنى معاه عشان المصاريف غالية هناك، وأنا وافقت على الجواز وخاصة لما والدته مثلت عليا انها بتحبنى وتشيلنى فوق راسها، واتجوزنا بعد ٤ شهور فقط من الخطوبة عشان يرجع سفره وقضي معايا ٤ شهور خلص فيهم ورق كان ناقص واخته اتجوزت وسافر على طول، ومن اول ما سافر نادرا جدا انه يكلمنى ولو كلمنى ميزودش غير دقيقتين او ثلاثة وكلام رسمى قدام اهله وانا عايشة فى بيتهم أخدم الكل عشان أخته الكبيرة اتجوزت، وعمرى ما اشتكيت ولا طلبت حاجة وراضية بنصيبي على أمل أنه نازل إجازة قريب لكن عدى سنة ونص ومنزلش بحجة الشغل'.
وفاء تطلب الخلع: كان نفسي يطبطب عليا مش يجري ورايا في الشارع عشان خاطر أمه
'عمرى ما حاول يطبطب عليا أو يراضينى بكلمة عشان أفضل مستحملة كل تصرفات والدته معايا لكن كان ابن أمه كل كلامها أوامر وميقدرش ينفذ حاجة غير لما يستئذن منها، حتى لو وصلت أنى طلبت منه اشترى هدوم ولا هدية لأهلى، ووالدته ست صعبة جدا عايزه يفضل طول اليوم يضرب ويعلى صوته عليا وهو كان بيعمل كدا فعلا لدرجة أنها كذبت وقالت أنى غلطت فيها وجرى ورايا فى الشارع عشان يضربنى'.. كلمات نطقت بها وفاء والدموع تملأ عينها من داخل محكمة الأسرة بزنانيرى لرفع دعوى خلع من زوجها بعد عام وشهرين من الزواج مبررة استحالة العشرة معه.
ميادة تطلب الخلع: بيقولي اتجوزتك جبر خواطر لأهلي
'عمري ما كنت أتخيل إن جوزي يقولي أنا متجوزك جبر خواطر لأهلي، لكن عمري ما فكرت فيكي ولا حبيتك وحياتنا هتفضل كدا عجبك تعيش موافق مش عاجبك هسيبك معلقة لحد ما تتنازلي عن قائمة المنقولات الزوجية، دا غير معاملته ليا وتحكماته في كل حاجة تخصني' جاءت هذه الكلمات على لسان ميادة وهي داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه بسبب معاملته القاسية معها.
أسماء فى دعوى النفقة: «رماني أنا وابنه المعاق وقرر يتجوز تاني»
'اتهمنى ان أنا السبب فى إنجاب طفل معاق ومصاب بضمور فى المخ، ومن أول ما اتولد وعرف انه مريض وهو بيكرهه لدرجة انه محاولش يحس بمشاعر الأبوة وياخده فى حضنه، والغريبة انه بيفكر يتجوز تانى عشان يخلف طفل سليم وسابنى أنا وابنه عند أهلى حتى مصاريف العلاج رفض يبعتها لابنه وأهلى هم اللى بيصرفوا علينا وبيكشفوا على ابنى'.. جاءت هذه الكلمات على لسان أسماء وهى داخل محكمة الأسرة لرفع دعوى خلع من زوجها بعد عامين ونصف من الزواج مبررة استحالة العشرة معه.
تابعوا آخر أهل مصر على Google News
