"بعد جوازنا بسنة اكتشفت إن جوزي عنده مشكلة في الإنجاب ومحتاج عملية كبيرة وبمبلغ ضخم، وعلى الرغم من كدا صبرت عليه ومفكرتش إنى أطلب الطلاق لحد 7 سنين، وبعدها قدر يجمع مبلغ العملية وربنا كرمه وعملها وبقى قادر إنه يخلف وسبحان الله بعد ما عمل العملية ربنا ابتلانى بفيروس محتاج فتة علاج عشان أخف منه الأول وبعدين أحمل، وكنت فاكرة هيقف جنبي لكن جرى وقرر يتجوز عليا عشان يخلف وكمان عايزنى اتقبل الأمر الواقع".. جاءت هذه الكلمات على لسان مروة وهى داخل محكمة الأسرة لرفع دعوى خلع من زوجها بعد 7 سنين ونصف من الزواج.
وقالت الزوجة فى مستهل حديثها لـ"أهل مصر": "لما اتجوزت كنت فاكرة إنى اخترت الإنسان الصح والسند ليا في الدنيا، وكنت ديما بتعامل معاه على هذا الأساس، كل تصرفاته باخدها بالجانب الحسن ولما ربنا أراد بعد سنة من زواجنا نكتشف أنه مريض وغير قادر على الإنجاب ويحتاج إلى السفر بالخارج، ومبلغ العملية كبير ويمكن أن يفعلها فى مصر، وتحملت ورضيت بالأمر دون حتى أن أفكر في الانفصال عنه وبدخر معاه كل قرش عشان العملية تتم ونفسيته أن يكون إنسان سوى".
وتابعت حديثها قائلة: "فعلا مرت 7 سنين وربنا كرمه وعمل العملية ونجحت وكنا طايرين من الفرح لحد ما الدكتور طلب إننا نعمل تحاليل عشان يتأكد أن كل الأمور كويسة وفى استعداد للحمل، وقتها اكتشف الدكتور إنى عندى فيروس محتاج شهور للعلاج ولازم اتعالج منه قبل الخلفة وحمدت ربنا وكنت فاكرة إني جوزى هيستنى لحد ما أقوم بالسلامة ونخلف، لكن لقيته بيقول لى أنه خايف يحصل حاجة تانى وأنه ما صدق أنه عمل العملية عشان يشوف ضفر عيل، وأنه هيتجوز وهتكون للخلفة وإنى أنا هكمل معاه على نفس الوضع لحد ما أخف وأخلف في أي وقت، وقتها اتصدمت إزاى نسي كل اللى عملته، ورفضت الوضع لكن هو صمم واتجوز ورفض يطلقنى فرفعت عليه دعوى خلع ومازالت الدعوى منظورة أمام القضاء".
تابعوا آخر أهل مصر على Google News
