نجل الحاجة حنان المُعتدى عليها من زوجته: «ملعونة الغربة اللي وصلتني لكده.. وبنتي مش هتتربى معاها تاني»

كشف علي نجل الحاجة حنان صاحبة واقعة ضربها من زوجته، أثناء سفره للعمل في دولة الإمارات، مما دفعه للنزول إلى مصر وحل المشكلة.

وقال 'علي'، في تصريحات خاصة لموقع وجريدة 'أهل مصر': 'أنا بشتغل عامل بناء في الإمارات، وقعت ما رجعت من الشغل شوفت الفيديو مكنتش متأكد غير لما فرغت الكاميرات، لقيت فعلا مراتي اعتدت على أمي وضربتها'.

وأضافت: 'كان نفسي أغمض وافتح عيني أكون قدام أمي عشان أحاول أعتذر لها عن اللي حصل عشان أمي متستهلش كده، أمي ست كافحت عشان خاطر ولادها، ولو كنت موجود مكنش حصل اللي حصل'.

وتابع: 'ملعون أبو الغربة هي اللي وصلتني لكده، لما مراتي كانت بتغضب مني بتروح لأهلها وبعدين نعمل قعدت عشان نرجعها، والموقف بالنسبالي انا مكنتش حاسس بنفسي ومدوقتش طعم النوم من ساعة اللي حصل'.

وعن انتقادات السوشيال ميديا بمحاولته استغلال فيديو الواقعة من أجل الشهر والترند، رد علي قائلًا: 'اللي بيقولوا أني نشرت الفيديو عشان ابقى تريند وأشهر بأمي، أنا نشرت الفيديو عشان مراتي وأمها وأهلها ماشيين في البلد بيقولوا إن أمي هي اللي ضربت مراتي الأول واعتدت عليها'.

وتابع: 'أنا مكنتش هنشر الفيديو عشان عندي أخوات بنات وعندي بنت، بس حبيت أعرف أهل بلدي، إن مراتي وأهلها كذابين، وهاخد حقي بالقانون ومراتي الله يسهلها وبنتي مش هتتربى معاها'.