طالب وائل صبري أحد ملاك مطاعم أبو حمزه وبلال وحليمة بضرورة وضع حل جذري لمشكلات تطبيق طلبات المتخصص في توصيل الطعام مشيراً إلى أن أكثر من 35% من الأوردرات التي يتم تنفيذها عبر التطبيق يشتكي منها العملاء.
وقال صبري في منشور على موقع التواصل الاجتماعي 'فيسبوك' أنه يحاول التواصل بالشركة دون رد حيث يتسبب ذلك في تكبد المطاعم خسائر نتيجة التعاقد مع تطبيق طلبات.
نص شكوى أصحاب المطاعم من تطبيق طلبات
وجاء نص منشور صبري كالآتي : 'الساده المحترمين شركه Talabat ، هو في ايه ! اللى حقوله ده مفروض مطاعم كتيييييير تتكلم معايا فيه لاننا بنخسر كتير اوى اوى كدهبنخسر من سمعتنا وفلوسنا
انا بحاول اتواصل مع اي اداري في الشركه مش عارفين نوصل لحد واللى ماسك الاكونت بيمشي كل شهر تقريبا ولحد ما يجي اكونت مانچير جديد ونعرفه بيبقي خلاص هيمشي ٣ شهور مفيش حد ماسك شغلنا وبنحاول نكلمكم ولا حياه لمن تنادي
بس فى مشاكل تانيه كتير اوي الطيارين بتوع حضرتكم عاملين لينا مصايب وكوارث في الشغل
زمان الطيارين بتوعكم كانوا علي الفرازة دلوقتى احنا بيجلنا طيارين مظهرهم العام لا يليق انهم يطلعو للعملاء وخليني احكي لحضرتكم علي سبيل المثال ، امبارح انا جالي طيار في مطعم بلال يستلم اوردر الدليفري لابس تشيرت وشورت وشبشب وهدومه مقطعه شكله كان بيتخانق جاي يستلم اوردر عشان يطلع بيه لعميل طبعا رفضت اسلمه الاوردر وكنسلت الاوردر كله عشان مينفعش اللي مش هقبله علي اهل بيتي مش هقبله علي باقي الناس !!
من اسبوع تقريبا طيار من طلبات استلم اوردر من مطعم ابو حمزه التجمع وسلمه للعميل بعدها بساعتين شكوي من العميل علي صفحتي العميل باعت لينا فيديو وطيار طلبات بيسرق كوتشي من قدام باب شقته طبعا انا كنت في نص هدومي واعتذرت علي حاجه انا ماليش اي ذنب فيها غير ان العميل ده بيثق في مطعمي بس طلب اوردر من طلبات
الاوردرات بنسبه 35% بتوصل فيها مشاكل ده طبعا غير الاوردرات اللي بتتاكل نصها في الطريق وطلبات مبتعوضش عملاء مع الاسف وبنضطر عشان منزعلش حد مننا نبعت اوردرات مجانا علي حسابنا للعملاء
طبعا في طيارين في طلبات علي راسنا وفوق دماغنا وناس محترمه جدا بس بجد في ناس مطلعه عنينا
حد حيقولى ايه اللى غاصبك؟؟؟؟الرد ان طلبات مسيطره على سوق الاكل والموضوع كبير جدا حاليا عليها وفى مطاعم راحت فالرجلينف انا مضطر مش اكتر
مشاكل كتير بالجمله ومش عارفين نتكلم مع مين ولا نقول لمين مشاكلنا انا علي الحال ده من سنه ! انا والله ما بحب لا احكي ولا اتكلم ولا اكتب علي الفيس ولا بحب الشوشره بس اتاكدو اني لما عملت كده عملت لاني فاض بيا'
أصحاب المطاعم : نتكبد خسائر بالغة بسبب الطيارين وإدارة التطبيق تتجاهل شكوانا
تابعوا آخر أهل مصر على Google News
