نجوى فى دعوى الخلع: "حاطط كاميرات في أوضة النوم وبيصورني أثناء العلاقة الحميمة"

"عمرى ما كنت أتخيل إنه إنسان ملوش أمان بالشكل ده وإنه بيحط كاميرات فى أوضة النوم والله أعلم سجل بيها ايه ولا صورني فى أوضاع ولا لأ، لإن أخويا اللي اكتشفها لما كان بالصدفة عندي، وبلغت أهلي وواجهوه، وقال إنه حاطهها عشان يعرف اللي بيدور فى بيته وهو غايب، لكن أهلي رفضوا أكمل معاه وهو رفض يطلقني" بهذه الكلمات نطقت "نجوى" وهي داخل محكمة الأسرة لرفع دعوى خلع على زوجها بعد عام من الزواج مبررة استحالة العشرة معه.

وقالت الزوجة "نجوى"، في مستهل حديثها مع "أهل مصر": "اتجوزت من سنة جواز صالونات، من موظف بشركة وعلى الرغم إنه أقل مننا فى المستوى الاجتماعي والمادي إلا إني وافقت عليه لما حسيت بالقبول، وأنه شخص طيب، واتجوزنا وكانت الحياة بيننا زي أي زوجين، وأهلي كانوا بيحبوه وبيعاملوه زي أخويا بالظبط وبيساعدونا في مصاريف البيت، لحد ما فى يوم أخويا اللى فى الجامعة كان عندى فى يوم وطلبت منه ينقل معايا حاجة فى أوضة النوم وجوزي كان فى الشغل، وبالصدفة لقيت أخويا بيقول لي في كاميرات فى أوضة النوم متركبة".

وتابعت حديثها: "كانت صدمة ليا إزاي يركب كاميرات في أوضة النوم وايه الهدف منها واشمعنا أوضة النوم، وأخويا اتصل على أهلي وانتظروا جوزي لما رجع من الشغل وواجوه واتخانقوا معاه، لكن هو دافع عن نفسه إنه مركب كاميرات عشان يعرف ايه بيحصل فى البيت وأهلي مصدقوش، وطلبوا منه يطلقني لكن رفض عشان كدا رفعت دعوى خلع بمحكمة الأسرة وانتظر أولى الجلسات".