عمرو أديب لمنتقدي بيومي فؤاد: "كان في 7 مطربين مصريين بيغنوا في أبوظبي ولا حد قرب لهم"

علق الإعلامى عمرو أديب على الهجوم الذي طال بيومي فؤاد بعد رده على محمد سلام: قائلاً : «اللي انتوا بتعملوه مع بيومي فؤاد؟! هو الراجل عمل إيه؟! إيه اللي انتوا بتقولوه عن الراجل، إيه الشتيمة القبيحة دي؟! ده لو بيعرض في إسرائيل مش هتعملوا معاه كده، ايه الهيستيريا دي؟!».

وقال «أديب»، خلال تقديمه برنامج «الحكاية» عبر قناة «إم بى سى مصر»، مساء أمس الأحد : «متضايق من بيومي فؤاد وشايفه عبده للفلوس والمادة ومش شايف فلسطين، انتوا شايفين اللي اتعمل في بيومي النهارده أد اللي عمله، هل العقاب الجماعي الأسطوري اللي معمول أد الكلمتين قالهم على المسرح؟ هو عمل إيه؟ الراجل بيشتغل شغلته، بيشتغل ممثل، إيه السر».

وتابع «أديب»: «أول امبارح كان في 7 مطربين مصريين بيغنوا في أبوظبي، ولا حد قرب لهم، في مصر في عدد من الحفلات ولا حد قرب لهم، إنما هو عشان في الرياض، أنا بتكلم بصراحة، هو عمل إيه؟ هو واللي معاه عملوا إيه".