تقدم أحمد بدعوى قضائية داخل محكمة الأسرة ضد زوجته لتطليقها بعد 6 سنوات من الزواج مبررا ذلك بقوله: "كنت بعتبرها كل حاجة فى حياتى وافقت انى أتغرب وأشتغل بعيد عن المحافظة عشان خاطرها هى وابنى ومخليهمش محرومين من حاجة، لكن مكنتش أعرف أنها هترد لي كل اللى بعمله ليها بالإساءة ليا وخيانتى، مكنتش مصدق ابنى الصغير لما قالى فى واحد ضيف جه عندنا يا بابا الشقة وجاب لى حلويات، ولما قعد يوصف ليا لقيتني معرفش حد كدا، ولما واجهتها إجابتها كانت غريبة ليا دى غلطة وملمسنيش والله العظيم".
وقال أحمد عن دعوى التطليق التى أقامها ضد زوجته: اتجوزتها من 6 سنين هو فعلا كان زواج صالونات، لكن يعلم ربنا من أول ما شوفتها وهى دخلت قلبي، واتمنيت أنها تكون مراتى وأكون أسرة مستقرة معاها، وفعلا اتجوزنا، ومنكرش انها كانت طيبة معايا وربنا رزقنا بطفل أول ما اتجوزنا على طول وكان نور عينى، واتفقت معايا انى أشوف شغل كويس عشان نحسن دخلنا ونبنى مستقبل لأولادنا.
وأضاف: فعلا اشتغلت فى محافظة تانية وسافرت وأنا معنديش شك لو 1% أنها ممكن حتى تفكر فى واحد غيرى مش تدخله البيت، وسافرت للشغل ومرت الشهور والسنين وكانت حياتنا كويسة وأبنى وصل 5 سنين، وفى أجازتى كالعادة راجع البيت بعد غياب شهر أسلم على ابنى ومراتى، اتفاجت أن ابنى بيحكى على راجل غريب وبيقول عليه عمو جاب لى حلويات وبحبه، والغريبة ان مراتى اتصدمت ووشها ضرب ألوان.
وتابع حديثه قائلا: حاولت مراتى تقفل على الموضوع وتغير الموضوع وتقوله قصده على أخويا، لكن ابنى رد وقالها لا يا ماما مش خالو دا واحد جديد عمو، وكأن القدر أراد أن تفضح ويكشف بصيرتى، وضعفت واتكلمت معايا وقالت أنه واحد كان زميل دراسة ليها بس وأنه أتجرأ وزارها وكان بينهم كلام عادى لكن عمره ما لمسها، وقعدت تحلف، لكن أنا مقدرتش أستوعب ولا كلمة من كلامها، صدمتى كبيرة أنها تدخل راجل غريب بيتى ويقعد مع أبنى كمان، حتى لو ما لمسهاش، ازاى تتكلم معاه وكأنه شئ عادى، مقدرتش أغفر لها وقررت أطلقها وآخد ابنى يعيش معايا، عشان كدا رفعت دعوى تطليق ومنتظر أولى الجلسات.
تابعوا آخر أهل مصر على Google News
