"كانت صدمة عمرى لما عرفت ان جوزى على علاقة غير شرعية بواحدة أكبر منه بـ15 سنة، وبيروح لها البيت لدرجة أنه دفع لها 20 ألف جنيه عشان يمارس معاها العلاقة الجنسية، ويروح وييجى عليها براحته وكمان مضى إيصالات أمانة على نفسه ليها، لحد ما ربنا كشف ستره وكل حاجة ظهرت وبيندم وعايز يبيع دهبي عشان يسد إيصالات الأمانة ويرجع لينا ويسيبها، وميعرفش أنى مش طايقة أشوف وشه دقيقة واحدة".. نطقت بهذه الكلمات سحر والدموع تذرف من عينيها وهى داخل محكمة الأسرة لرفع دعوى خلع من زوجها مبررة استحالة العشرة.
وقالت الزوجة فى مستهل حديثها مع "أهل مصر": أنا متجوزة من 4 سنين زواج صالونات، لكن العشرة والسنين اللى قضيتها معاه قربت منه وكان كل حاجة ليا، لو طلب عينى مكنتش هبخل عليه، واستحملته وساعدته فى مشروع فتحته ووقفت زى الراجل معاه، عشان يكبر، عمرى ما اشتكيت من قلة الفلوس على الرغم أن كانت بتيجى علينا أوقات صعبة جدا فى البداية، لحد ما ربنا كرمه والشغل بقي كويس معاه والدنيا مشيت، وبدل ما يرد المعروف اللى عملته راح خانى وعرف عليا واحدة ضحكت عليه أكبر منه بـ15 سنة، ودخل بيتها وعمل كل حاجة حرام معاها وهو مش حاسس بالذنب.
وتابعت حديثها قائلة: كانت واخدة عقله نهائيا لدرجة انه دفع 20 ألف جنيه عشان يمارس علاقة غير شرعية معاها، ودا اللى اكتشفته فى الرسايل بينهم لما ربنا كشف ستره، وعرفت الحقيقة وقلت لأهله اللى وقفوا جنبى وطلبوا منه يسيبها ويرجع لبيته، لكن هو اعترف أنه موقع على إيصالات أمانة ولازم يسددها قبل ما يسيبها، والغريب أن جرأته وصلت انه يطلب منى أبيع دهبي عشان يدفع ليها الفلوس، عشان كدا طلبت الطلاق لأنى فعليا مش قادرة أسمع صوته ومش طايقة العيشة معاه لكن رفض يطلقنى عشان كدا رفعت دعوى الخلع وأنتظر أولى الجلسات.
تابعوا آخر أهل مصر على Google News
