سارة تطلب الخلع: أمه بتغير عليه مني

"رضيت أتجوز في بيت عيلة لما هو قالي إنه وحيد أمه في الصبيان ومش هينفع يسيب أمه لوحدها بعد ما إخواته البنات اتجوزوا، وربنا يعلم اعتبرتها زي أمي وكنت بعاملها كويس وبراعي ربنا فيها ومستنية تقدرني أو تعاملني زي بناتهاـ لكن عاملتني أسوأ معاملة لدرجة أنها مكنتش بتضحك في وشي"، جاءت هذه الكلمات على لسان "سارة" وهي داخل محكمة الأسرة لرفع دعوى خلع من زوجها بعد 3 سنوات من الزواج.

وقالت الزوجة فى مستهل حديثها لـ"أهل مصر" : "لما خلصت دراسة اتقدم ليا عريس وحيد امه من الصبيان ومعاه اتنين إخوات متجوزين، وبيشتغل في شركة ومنكرش أن أخلاقه كويسة لكن ميقدرش يزعل أمه في أي حاجة، حتى لو على حساب أي حد أو كانن ظالمه، ولما اشترط عليا قبل الجواز نعيش مع أمه وافقت عشان كان نفسي أكسب رضاها وتكون كويسة لكن معرفتش بسبب غيرتها مني على ابنها، وحاولت معاها بكل الطرق لكن مافيش فايدة، عمرها ما ضحكت في وشي ولا جبرت بخاطري".

وتابعت حديثها قائلة: "بدأت المشاكل والخلافات تزيد بينا بسبب والدته، وهو طبعا بيجي في صف والدته حتى لو هي غلطانه، ومبقتش قادرة أتحمل كلامها ولا طريقتها خاصة أنها جايبة عيب تأخير الحمل مني رغم أني التحاليل أثبتت أني بخلف، عشان كده رفعت دعوى الخلع ومازالت الدعوى منظورة أمام القضاء".