فاتن لقاضى الأسرة: "ضربنى لما رفضت شغل برجع منه الفجر.. ويبيع عرضه عشان الفلوس"

"مش عارفة ازاى قابل على رجولته إنى أشتغل وأصرف عليه، ويتخانق معايا لما رفضت شغل برجع منه الفجر لدرجة إنه ضربنى عشان يجبرنى انزل الشغل على الرغم إنى الجيران بيتكلموا عليا عشان برجع متأخر وهو لايهمه شىء غير الفلوس، ومش مهم شرفي فى الطين".. جاءت هذة الكلمات على لسان "فاتن"، وهى داخل محكمة الأسرة لرفع دعوى خلع من زوجها بعد عام وشهرين من الزواج مبررة استحالة العشرة معه.

وقالت الزوجة فى مستهل حديثها لـ"أهل مصر": "جوازي منه كان غلطة كبيرة لما حسيت إنه بيحبنى وهعيش معاه أجمل أيام حياتي لكن الحقيقة كنت عايشة في جحيم اكتشفت بعد الجواز إنى هو متجوزنى اصرف عليه وهو فجاءة بعد الجواز بقي عليه ديون، وطلب منى انزل شغل وأساعده وفعلا نزلت شغل وكنت بساعد معاه أو تقريبًا كنت بصرف عليه فى كل حاجة، لحد ما جالى عرض شغل في تنظيم الأفراح بمرتب كويس، واشتغلت فترة قليلة لحد ما بدأت الناس تتكلم عليا عشان برجع فى نص الليل".

وأضافت الزوجة قائله: "قررت أسيب الشغل دا عشان السهر، وأرجع أشتغل فى مدرسة، لكن اتفاجئت به بيرفض عشان المرتب، وحصلت خناقة بينا بسبب الشغل لدرجة إنه ضربنى وجبرنى أنزل الشغل لأنى مرتبه كبير، وأتاكدت إنه ممكن يبيع عرضه عشان خاطر الفلوس، وقررت بعدها انفصل عنه قبل ما ربنا يكرمنى بطفل منه ورفعت دعوى خلع ومازالت الدعوى منظورة أمام القضاء.