رحمة في دعوى الخلع: أمه بتدخل علينا أوضة النوم وهو رافض ياخد منها المفتاح

'عمري ما كنت أتوقع أن حماتي تكون ست متسلطة بالشكل البشع دا، لدرجة أنها تدخل علينا أوضة النوم من غير أي حياء ولا حرج بحجة أنها بتصحينا، وواخدة مفتاح الشقة ولو قفلت الترباس من جوه تولع البيت حريقة وتخلي جوزي يقلب عليا، ولما طلبت منه هو يأخذ المفتاح منها لأني حاسة إنها بتفتح علينا الباب في أوقات حرجة، رفض وقعد يشرح في حكم ومواعظ وأنها والدته تعمل اللي هي عايزاة، وأنا كمان حرة وعشان كدا طلبت منه الطلاق' جاءت هذه الكلمات على لسان رحمة وهي داخل محكمة الاسرة لرفع دعوى خلع من زوجها بعد عام واحد فقط من الزواج مبررة استحالة العشرة معه.

وقالت رحمة في مستهل حديثها مع 'أهل مصر'، 'خلصت دراستي في جامعة حقوق، واتقدم ليا عريس قريب واحدة جارتنا شافني لما جه يزورها، واتقدم ليا رسمي وأنا حسيت بالقبول من أول ما شوفته لكن قلقت من ناحية والدته لكن هي حست بكدا وغيرت المعاملة معايا لدرجة أنها كانت زي الملائكة وتسأل عليا، ووافقت إني أتجوز في بيت العيلة لما شوفت معاملة والدته ليا، وفعلا اتجوزنا بعد 4 شهور، وبمجرد شهر العسل انتهى، بدأت حماتي تظهر على وشها الحقيقي، وتتدخل في كل شئ حتى طلبات البيت والأكل والنوم وعلاقتي بجوزي، وكنت بتحمل في البداية على أساس أنها غيرة'.

وتابعت حديثها قائلة، 'كانت بتاخد نسخة من المفتاح الخاص بشقتنا وتفتح الباب في أي وقت من غير أي استئذان وفي أوقات حرجة لدرجة إني كنت بقفل بالترباس من جوه وجوزي زعق لأنها زعلت ورفض كمان يأخذ منها المفتاح واشترطت عليه إني أعيش براحتي في شقتي أو يطلقني رفض الحلين، عشان كدا رفعت عليه دعوى خلع ومازالت الدعوى منظورة أمام القضاء'.