بعد ٨ أشهر من الزواج.. سناء فى دعوى خلع: "من يوم ما اتجوزنا مش بيتعامل غير بالحزام"

'من يوم ما اتجوزنا مش بيتعامل غير بالحزام، بقالى ٨ شهور متجوزة فى بيت عيلة بخدم أمه وأبوه و٤ أخواته رجالة، وكل دا ومش عاجب وبيرجع أخر اليوم يطلع شيطانه عليا، ويضربنى بالحزام لحد ما كل حتة فى جسمى فيها آثار ضرب حتى الحمل نزل مرتين بسبب الخدمة فى البيت ليل ونهار'.. نطقت بهذه الكلمات 'سناء' وهى داخل محكمة الأسرة بزنانيرى لرفع دعوى خلع من زوجها بعد ثمانى شهور فقط من الزواج مبررة استحالة العشرة معه.

بيت العيلة

قالت الزوجة فى مستهل حديثها:'لما اتجوزت مكنتش أعرف أنى بيت العيلة هكون خدامة وبس فيه، كنت فاكرة انى جوزى وأهله هيعاملونى بما يرضي الله، لكن للأسف من أول ما دخلت بيت العيلة ولقيت نفسي بخدم البيت كله حماتى وحمايا و٤ اخوات عزاب ليه من اكل وشرب وغسيل وتنضيف، واخر الليل يكمل جوزى خناق وضرب بالحزام عشان يطلع تعب شغله عليا، حتى لما كنت حامل مرحمنيش بقي يضربنى لحد ما اجهضت مرتين.

رفع دعوى خلع

وتابعت حديثها لـ 'أهل مصر':' كنت بخاف اقول لأهلى عشان مبقاش مطلقة والناس تبص ليا نظرة وحشة لحد ما طفح بي الكيل، حتى اخواته مش بيدافعوا عنى وانا بضرب منه بيسبوه كلهم فى البيت بيعاملونى جارية ليهم، ولما حملى سقط فى المرة التانية قررت انى اقول لأهلى وبالفعل ساعدونى وخلونى اسيب البيت وطلبوا منه الطلاق ولكنه رفض، عشان كدا قررت أنى ارفع ضده دعوى خلع وأنتظر حكم المحكمة بالخلع وتخلصنى منه.