حرص المخرج ماندو العدل على توجيه رسالة قبل عرض الحلقة الأخيرة من مسلسل بين السماء والأرض اليوم، وهو العمل الذي تمحور في 15 حلقة فقط.
وقال العدل، عبر حسابه الرسمي على موقع التواصل الاجتماعي "فيسبوك": "الحمد لله والشكر لله، أخيرًا خلص مونتاج مسلسل بين السما والأرض والحلقة الأخيرة هتشوفوها النهاردة.. إن شاء الله، ومع إن المسلسل 15 حلقة بس، لكن ده أكتر مشروع تعبت فيه بحياتي".
وأضاف العدل أن التحضير وبروفات الأسانسير مع الممثلين بالـ16 ساعة يوميا، بالإضافة إلى العمل على السيناريو من بداية كل يوم لنهايته والتصوير بالـ20 ساعة، مشيرًا إلى المسؤولية التي تقع على عاتقه في إعادة فيلم من أهم 100 فيلم في تاريخ السينما، والذي كان من إخراج صلاح أبو سيف، واصفًا نفسه: "كنت عامل زي اللي هيشنق نفسه بإيده.. مشروع مرعب لأي مخرج نظرًا لمجرى أحداثه في الأسانسير".
وتابع: "حاجة أول مرة تتعمل في التليفزيون شهور من الكوابيس وقلة النوم والأكل، وياما حلمت بأسانسيرات وأنا نايم، بس خلاص بقيت بطلع على السلم، مش عايز أشوف أسانسيرات تاني في حياتي، لكن الحمد لله ربنا كريم ومضيعش تعبنا كلنا على الفاضي".
واختتم: "شكرًا شركة سينرجي، شكرا كل الصناع، كرم ربنا ده نتيجة تعبكم ومجهودكم.. شكرا للممثلين الجامدين اللي حبيتهم فعلا من كل قلبي.. شكرًا رانيا المنتصر بالله وفريقها، المونتيرة الكبيرة اللي مش واخدة حقها، شكرًا طارق الكاشف ووقفتك معايا عمري ما هنساها لحد آخر يوم في حياتي.. شكرًا يا رب قبل كل حاجة".
تابعوا آخر أهل مصر على Google News
