تقدمت دينا بدعوى قضائية أمام محكمة الأسرة بشمال الجيزة لطلب الخلع من زوجها بعد عام واحد من الزواج مبررة ذلك بقولها: "دايما مرتبك في كل تصرفاته وشخصيته ضعيفة جدا قدام أي حد، لدرجة إن كل الناس حتى أهلي بيستغلوه إنه يخلص ليهم مشاوير، وقدامي كمان شخصيته ضعيفة بشكل مش طبيعي، كل ما أقوله على حاجة يقولي اللى تشوفيه اعمليه، براحتك حتى حاسة إن أنا الراجل مش هو، ومن أقل كلمة مع حد في الشغل عنده يرتبك ووشه يحمر، وكأنه بنت مش راجل، لحد ما بقيت أتكسف منه في أي مقابلة مع الأهل أو الأصدقاء".
وقالت دينا في مستهل حديثها مع "أهل مصر": من أول ما اتقدم وأنا كنت مستغربة إنه قاعد مكسوف وأنا اللي بفتح حوارات معاه عشان يتكلم كنت في البداية بقول عشان مالوش اختلاط بالبنات قبل كدا، وبمجرد ما نتجوز هيفك ويتجرئ شوية، لكن للأسف بقي زي ما هو، حتى يوم الفرح كانت الناس بتتريق عليه من شدة ارتباكه، وكنت بساعده وتخليت عن كسوف أي بنت في يوم فرحها عشان اساعده ونعدي الليلة، لكن فضل زي ما هو مرتبك وخجول جدا وشخصيته مهزوزة، كل اللي حواليا بيستغلوه، واخواته البنات المتجوزين بيأخدوا فلوس منه عشان بيتكسف يقولهم لا.
وتابعت حديثها قائلة: كنت بحاول معاه إنه يقوي شخصيته ويرفض استغلال الناس ليه لكن مافيش فايدة زي ما هو، لحد ما وصلني لدرجة الخجل منه لو في مناسبة أو أي في مكان مكنتش بحب اخرج معاه، ولما طلبت الانفصال بهدوء راح سأل أمه وطبعا اتكلم بلسان أمه، عشان كدا قررت أوفر على نفسي الطريق وارفع دعوى خلع بمحكمة الأسرة وانتظر أولى الجلسات.
تابعوا آخر أهل مصر على Google News
