شيرين بدعوى خلع:" شاف كل حاجة وحشة فيا.. وبيقول لي جسمك مش حلو"

"كان شايفني وعارفني قبل ما نتجوز وكان بيقول لي انتى حلوة وكل حاجة عجبانى فيكى لكن فجاءة كل دا اتغير بعد الجواز وبقي شايفنى رفيعة وقصيرة وتفكيري مش مناسب ليه، وبقي يطلع حجج ليه كل دا عشان يبرر لنفسه إنه يتجوز عليا حبيبته القديمة بعد ما أطلقت وماشي يحكى مع الكل إنه تعبان معايا وربنا يعلم بتعامل معاه بما يرضي الله".. نطقت بهذه الكلمات "شيرين" وهي داخل محكمة الأسرة لرفع دعوى خلع من زوجها بعد 4 سنوات من الزواج مبررة استحالة العشرة معه.

وقالت الزوجة فى مستهل حديثها لـ"أهل مصر": "بعد ما خلصت جامعة اتقدم ليا شاب أكبر منى بـ٧ سنوات، وبيشتغل فى شركة خاصة ولما اتقابلنا حصل قبول شخصي، واتخطبنا ولا عمره انتقد جسمى ولا إنى قصيرة بل بالعكس طول فترة الخطوبة كان بيكلمنى كويس جدا، واتجوزنا بعد فترة خطوبة استمرت 5 شهور، وكنت مبسوطة جدا واتجوزنا وحياتنا كانت مستقرة، وربنا كرمنى منه بطفل وكانت نفسي الحياة تستمر كدا لكن فجاءة لقيت جوزى اتغير عليا فى المعاملة".

وتابعت: بقي كل حاجة فيا شايفه وحشة انى مش طويلة، رفيعة جسمى مش حلو، تفكيري مش مناسب ليه بقي يطلع فيا القطط الفطسانه، وكانت نفسيتى وحشة جدا ونفسي اعرف ايه اللى غيره من ناحيتى لحد ما اكتشفت انه حبيبته القديمة اتطلقت ورجعوا يتكلموا مع بعض، وشوفت الرسائل بينهم ولما واجهته اعترف انه هيتجوز عليا، واعترضت وطلبت منه يطلقنى لكن شرط يأخد ابنى منى عشان يطلقنى فرفضت ورفعت عليه دعوى الخلع ومازالت الدعوى منظورة امام القضاء.