"كان عايش فى دور القدوة وبعيب على كل الناس اللى حواليه، حتى أنا عرف يضحك عليا كويس جدا، لما يوهمني إنه زوج مثالى، واكتشف إن ليه علاقات ومعاه شقة بيقابل فيها ستات هو وأصحابه عشان مزاجهم، عشان كدا ربنا كشف سترهم ووقعت الرسائل فى ايدي عشان يرفع الغمامة اللى كانت على عنيا"، بتلك الكلمات بدأت أميرة قصتها وهى داخل محكمة الأسرة لرفع دعوى خلع من زوجها بعد 3 سنوات ونصف من الزواج مبررة بذلك استحالة العشرة معه.
وقالت الزوجة فى مستهل حديثها مع "أهل مصر": "أنا متجوزة من 3 سنين ونص، من شاب أكبر مني بـ ٧ سنين وبيشتغل فى شركة في القطاع الخاص، ومن أول ما اتجوزنا وأنا مش شايفة حد زيه من كتر ما هو بيمثل عليا الأخلاق والاحترام والحب، وكنت شايفة إنه كتير عليا، ولو شاف أو سمع إن حد خان مراته يفضل يتكلم معايا ويقول لى "ازاى قلبه طاوعه يعمل كدا؟، وربنا يهديه" وخلاف من الكلام اللى يأكد بيه لينا إنه إنسان نقي، وفعلا وصلت لمرحلة إنه مفتحش رسايله ولا تليفونه من كتر ما الثقة كانت جوايا إنه استحالة يغدر بيا أو يجرحني، وكانت الحياة بينا ماشية ومستقرة وربنا أكرمني بطفل ومكملش أيام وتوفي".
وتابعت حديثها: "كنت عايشة مش شغاله بالي غير إني أخلف وبس منه، لكن ربنا ليه حكمة إن مفيش حاجة بينا تربطنا أكتر، كنت بكلم والدتى من تليفونه وهو كان نايم، ولقيت صوباعي بتضعط على النت عشان افتح نقطة اتصال ليا على التليفون، وفجأة لقيت رسالة من زميل ليه بيكلمه إنه هيجب ليهم بنت بالليل ويتقابلوا فى الشقة بتاعتهم، وفهمت من الحوار إنهم معاهم شقة مشبوهة ولما واجهته متكلمش لحد ما طلبت منه الطلاق ورفض وطلب فرصة تانية، لكن مقدرتش فرفعت عليه دعوى الخلع ومازالت الدعوى منظورة أمام القضاء".
تابعوا آخر أهل مصر على Google News
