"بدل ما يتكسف على نفسه ويحس بالذنب والإحراج لما واجهته برسايل إباحية ليه مع بنت على النت وبينهم صور وعلاقة جنسية على التليفون، بجح فى وشي وكأنه مش بيعمل أى شيء غلط، ولما دافعت عن حقي كسر على دماغى عصاية المقشة وخدت فيها غرز".. جاءت هذه الكلمات على لسان "سما" وهى داخل محكمة الأسرة لرفع دعوى خلع من زوجها بعد عام ونصف من الزواج، مبررة استحالة استكمال الحياة الزوجية بينهما بعد أن اكتشفت خيانته.
وقالت الزوجة فى مستهل حديثها مع "أهل مصر": لما خلصت دراسة فى المعهد اتقدم لي شاب أكبر منى بـ ٥ سنين، وبيشتغل مع والده فى محل وقعدت معاه فى الرؤية الشرعية وحسيت براحة ناحيته وعشان كدا وافقت على الجواز، وهو طول الوقت فى فترة الخطوبة كان بيخلينى اتعلق به جدا، وفعلا دا اللى حصل وكنت بستنى اليوم اللى هكون فيه مراته وقاعدة معاه فى مكان واحد، واتجوزنا بعد ٥ شهور من الخطوبة، ولما كنت بسأله عن علاقات ليه قبل الجواز كان يقول مالوش فى العلاقات دى وبيحب الحلال، ودا خلانى أثق فيه جدا.
وتابعت حديثها قائلة: كانت الحياة بينا مستقرة وبدعى ليل ونهار ربنا يكرمنى بطفل منه، لحد ما فى يوم فتحت تليفونه وكنت قاعدة بتسلي واتفرج على الرسايل اتفاجئت برسالة من واحدة محتواها غير أخلاقي وأكدت لي انه على علاقة محرمة بيها، ومقدرتش استنى وقررت أواجهه وكنت فاكرة انه هيعتذر لكن اتفاجئت بيه بيزعق وانى مكبرة المواضيع وأن هو حر وراجل وأكيد ليه نزوات عادية، واتخانقت معاه وقولت انه مش من حقه يعمل كدا طول ما أنا محافظة على شرفه، والكلام اتطور بينا لحد ما رفع عليا عصاية المقشة وكسرها على دماغى أخدت فيها غرز، وقررت أرفع عليه دعوى خلع ومازالت الدعوى منظورة أمام القضاء.
تابعوا آخر أهل مصر على Google News
