شهدت محاكم الأسرة العديد من قضايا الخلع والطلاق على مدار هذا الأسبوع، حيث يقف الزوجان أمام القاضي لإنهاء الحياة الزوجية بينهما بناء على قرار أحد الطرفين، وذلك بأسباب تكون معلنة وأحيانا فى الخفاء، لتسطر أسماءهم فى سجلات محاكم الأسرة، وترصد ' أهل مصر ' أبرز هذه الدعاوى على مدار الأسبوع من داخل محاكم الأسرة .
زينب تطلب الخلع: بيخونى قدام عنيا.. ويقولي دى فراغة عين مني
'مش قادرة أتحمل أكتر من كدا، خاننى مرتين مع ستات متجوزة، وبينهم أحلى كلام رومانسي ودلع دا انا اللى مراته مش بيهتم بيا زيهم، طول اليوم تليفونه مشغول ولما واجهته انه بيعرف ستات لما شوفت الشات بتاعه أول مرة اعتذر وطلب انى أسامحة ومش هتكرر تانى، ووافقت فى الأول عشان خاطر ولادى رغم انه عمل معاها علاقة جنسية كاملة، واستحملت لكن هو للأسف مندمش ورجع يلعب من ورايا تانى وعرف واحدة متجوزة تانى وطول اليوم تليفونه مشغول معاها ولما اقوله ليه بتخونى يقول لى 'العيب مش منك أنا عينى فارغة'.. جاءت هذه الكلمات على لسان زينب وهى داخل محكمة الأسرة لرفع دعوى خلع من زوجها بعد ٦ سنوات من الزواج مبررة استحالة العشرة معه.
محمد من داخل محكمة الأسرة: "قفشتها على سريرى وعشيقها لابس بيجامتى"
عمرى ما كنت أتخيل الست اللى آمنتها على بيتى وشرفي وطلعت أشتغل فى محافظة تانية عشان خاطرها تبيعنى بالشكل دا لدرجة أنها تخونى وعلى سريرى، أرجع قبل معياد سفرى بيوم من الشغل وعامل لها مفأجاة ومرضتش أقولها وافتح باب شقتى ألاقيها فى حضن عشيقها وهو لابس بيجامتى وعلى سريرى وكأنه بيته وهى مراته، فكرت أقتلها لكن قولت مضيعش نفسي عشانها، وفضحتها فى المنطقة ورفعت عليها دعوى زنا'.. جاءت هذه الكلمات على لسان محمد وهو داخل محكمة الأسرة لرفع دعوى زنا وتطليق زوجته.
أحلام تطلب الخلع من زوجها: بينام جنب أمه
'مرتبط بأمه بشكل مرضي، وبيرجع من الشغل عليها يقعد معاها، وممكن ينام جنبها ويسبني لوحدي'، هكذا اشتكت 'أحلام' من زوجها، وهي داخل محكمة الأسرة لرفع دعوى خلع، بعد عام ونصف من الزواج مبررة استحالة العشرة معه.
وتقول أحلام: 'علاقته معايا سطحية جدا حتى العلاقة الزوجية ممكن تحصل كل شهر مرة أو مرتين بس، لحد ما بقى فيه جفاء رهيب بيننا ومبقتش قادرة أتحمل أكتر من ذلك.
سمر تطلب الخلع: "جوزي هرب مع صاحبتي في نصف الليل وسابنى معلقة"
لم تتخيل سمر أن تأتى الخيانة من أقرب الناس إليها زوجها وصديقة عمرها التى كانت تقص لها كل أسرارها الخاصة، لدرجة أنها كانت تأتى إليها وتنام معها فى وجود زوجها بحجة أنها منذ طلاقها وهى لا تتحمل كلام أهلها، لتنشأ بين زوجها وصديقتها علاقة فى الخفاء دون علمها، ويقومان بتجهيز أوراقهما للسفر حتى جاء اليوم الذي هربا فيه سويا إلى الخارج، مما جعل الزوجة تقف داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.
ولاء تطلب الخلع: "بيكلم بنات ويوصف لهم جسمي"
'مش قادر يتوب ويبقى إنسان نضيف، على طول علاقاته النسائية مالهاش عدد، وكنت بدعيله بالهداية ومرة اغضب ومرة اتخانق عشان يبطل ويوعدني ويرجع تاني، لكن لما توصل بيه الجرأة أنه يكلم بنات ويوصف لهم جسمي بمنتهى البجاحة ويتريق عليا وعلى تفاصيل جسمي مع البنات على الشات مش هسكت'، جاءت هذه الكلمات على لسان ولاء وهي داخل محكمة الأسرة لرفع دعوى خلع من زوجها بعد ٣ سنوات من الزواج مبررة استحالة العشرة معه.
تابعوا آخر أهل مصر على Google News
