الخلع في أسبوع.. سلوى "بيضربني قدام امه عشان يحس برجولته".. وصفاء: "بيتحرش بأختي اللي في ثانوي"

شهدت محاكم الأسرة العديد من قضايا الخلع والطلاق باختلاف الأسباب والدوافع، أبطال هذه القصص أشخاص عاديون مثلنا ولكن كتب لهم القدر أن تسجل أسماؤهم في سجلات القضاء.

ويرصد 'أهل مصر'، في السطور التالية أبرز قضايا الخلع التي شهدتها المحاكم في الأسبوع الماضي.

سلوى لقاضى الأسرة: "بيضربني لما تيجي أمه عشان يحسسها أنه راجل"

'طول الوقت عنده عقدة نقص شايف الرجولة إنه يضرب مراته ويشتمها قدام الكل، عمره ما حس إن الرجولة إنه يطبطب على مراته ولا يخليها تحس إنه سندها، إنسان جاحد وأمه أكتر منه، حياتى معاه كرهتها حتى نفسه كرهته وقربه منى فى العلاقة'، نطقت بهذه الكلمات 'سلوى' وهى داخل محكمة الأسرة بزنانيرى لرفع دعوى خلع من زوجها بعد 6 سنوات من العذاب ذاقتها داخل بيت زوجها.

صفاء تصرخ من داخل محكمة الأسرة: "حاول يتحرش بأختي اللي في ثانوي"

'عينه من أختى اللى فى ثانوى، أول ما تيجى تزورنى يفضل قاعد ويبصلها بطريقة غريبة ونظراته ليها مختلفة؛ وهى بتتعامل معاه زى أخوها، وأنا كنت بكدب نفسي؛ لحد ما يوم مسك إيديها بطريقة غريبة وحاول يتحرش بيها، وانا كنت فى المطبخ وخرجت على صرختها'.. بهذه الكلمات اشتكت صفاء زوجها أمام محكمة الأسرة بزنانيرى لرفع دعوى خلع من زوجها بعد ٤ سنوات من الزواج مبررة ذلك باستحالة العشرة معه.

فاتن لقاضى الأسرة: "بيستحمى كل أسبوعين مرة وهيجيب لنا المرض"

'مش نضيف، ومش بيغسل ايديه لما يرجع من بره، ويستحمى كل أسبوعين مرة وانا خايفة على بنتى من المرض؛ وأن قلة نضافته تجيب لنا أنا وبنتى الصغيرة المرض؛ ورغم انى نصحته كتير يهتم بنفسه مفيش فايدة'.. نطقت بهذه الكلمات فاتن وهى داخل محكمة الأسرة لرفع دعوى خلع من زوجها مبررة استحالة العشرة معه.

زينب تستغيث بالقضاء:"كل ما أتكلم يضربني عايزني خرساء"

'طول الوقت يضربنى ويشتمنى عشان رديت عليه أو قولت رأيي فى حاجة؛ شايفنى ديما غبية ومش بفهم لحد ما خلى أهله يتعاملوا معايا انى حمارة بالظبط، ولو اتكلمت يضحكوا عليا وهو كمان يفضل يضحك معاهم وكأنى أراجوز بيتريقوا عليه'.. شكت زينب زوجها بهذه الكلمات أمام محكمة الأسرة بزنانيري في دعوى الخلع التى أقامتها ضد زوجها مبررة استحالة العشرة معه، بعد أن جعلها تفقد الثقة بنفسها أمام الجميع وجعلها انطوائية إلى حد كبير.