تقدمت إسراء إلى محكمة الأسرة بشمال الجيزة لتقديم دعوى نفقة من زوجها مبررة ذلك بقولها 'كنت بربي عياله وعمري ما غلطت معاه، كنت بستجيب لكل أوامره وبحترمه في غيابه وحضوره، ومكنتش أتخيل انه لما ربنا يبتلينى بالسرطان في الدم يسيبني فى وقت مرضى ويسافر مع واحدة إيطالية ويتجوزها عشان ياخذ الجنسية ويسافر معاها، حتى أولاده مش بيسأل عليهم ولا بيبعت مليم واحد ليهم، وأنا فى عز مرضي، كنت بضغط على نفسي واشتغل عشان أقدر أصرف عليهم، ولما عرفت أنه رجع مصر طالبت بحق ولادى فى النفقة'.
وقالت الزوجة في حديثها لـ'أهل مصر'، إنها تزوجت منذ 15 عام زواجا تقليديا، من شاب يكبرها بـ٥ أعوام، موضحة: 'ساندته ووقفت جنبه فى بداية حياته، كنت زى الخاتم فى صوابعه، ولا طلعت سر بيتنا لأى حد، وربنا رزقنى منه بطفلين ولد وبنت، والحياة كانت بينا كويسة لحد ما بدأ يتغير بالتدريج، وشاء القدر أن ربنا يبتلينى بمرض السرطان وكنت فاكرة انه هيكون جنبي ومعايا لكن اتفاجئت أنه قرر يشتغل فى فندق سياحى، ومكنتش أعرف أنه راح يصطاد أجنبية عشان يتجوزها'.
وتابعت حديثها: 'عرف واحدة إيطالية وقرر أنه يتجوزها ويسافر معاها، وقالى وبكل جراءة وكأنه أمر عادى، وقال لى أنه هيبعت لنا نفقات شهرية، ويزورنا فى أقرب وقت لكن راح ولا حس ولا خبر، ولا بعت قرش واحد للعيال، ولا كلمنا في التليفون، وأنا فى عز مرضي كنت بشتغل عشان أأكل ولادى، لحد ما سمعت أنه رجع مصر ولا سأل فينا عشان كدا قررت أرفع دعوى نفقة وأنتظر أولى الجلسات'.
تابعوا آخر أهل مصر على Google News
