"كنت بتحمل إهانته ليا بس بينى وبينه وبقول محدش شايفنا كل البيوت بيحصل فيها كدا وأنا لازم اتحمل عشان مخربش على بيتى وأتطلق لكن هو تمادى فيها وبقي يغلط فيا أكتر لدرجة انه غلط فيا قدام أخوه كان معزوم عندنا وأحرجنى قدامه وشتمنى بألفاظ قبيحة جدا، لدرجة ان أخوه أحرج ومشي على طول، متوقعتش انه ممكن يقول كلام زى دى قدام حد غريب".. جاءت هذه الكلمات على لسان ريم وهى داخل محكمة الأسرة لرفع دعوى خلع من زوجها بعد عام وشهرين من الزواج مبررة استحالة العشرة معه.
وقالت الزوجة في مستهل حديثها مع "أهل مصر": أنا اتجوزت من سنة وشهرين جواز صالونات وكنت فاكرة انه إنسان محترم زى اخواته الباقيين لأنى شوفت معاملتهم مع الستات اللى متجوزينهم لما جه يشوفونى أول مرة، لكن للأسف صوابع الإيد مش زى بعضها، واكتشفت دا بعد الجواز لما لقيته مختلف عنهم، وطبعه عصبي وبيغلط فيا جامد ويسبنى بأهلى ويشتمنى، وكنت بتحمل عشان مش عايزة اطلق وبمثل قدام أهلى وأهله انى أسعد إنسانة فى الدنيا وعمرى ما اشتكيت منه، ودايما أقول طول ما الكلام بينى وبينه ومحدش يعرف مش مشكلة، يمكن يحس ويعاملنى كويس زى اخواته، لكن هو فهم غلط وبقي يتمادى فى تصرفاته معايا لحد ما أحرجنى قدام اخواته.
وتابعت حديثها: كان أخوه ومراته عندنا عزمناهم على العشاء، وبجهز فى الأكل وبنتكلم عادى وبنهزر لحد ما اتفاجئت ان جوزى اتعصب على سبب تافهه، وبدأ صوته يعلى وشتمنى بأبشع الألفاظ القبيحة قدام أخوه ومراته مكنتش عارفه أرد ولا أعمل إيه وأخوه أخد مراته ومشي على طول من غير ما حتى ينطقوا واتفاجئوا من معاملته معايا، لأنى كنت بوهمهم انى فى منتهى السعادة، مقدرتش أقعد لحظة واحدة بعدها، وسبت له البيت وطلبت الطلاق ولكن رفض، فرفعت دعوى خلع بمحكمة الأسرة ومازالت الدعوى منظورة أمام القضاء.
تابعوا آخر أهل مصر على Google News
