محكمة الأسرة في أسبوع.. هالة: "متجوزة راديو مش بيفصل وإنسان مستفز".. رشا: "كان هيموتني عشان ظبطته مع زميلته على سريري"

شهدت محاكم الأسرة العديد من قضايا الخلع والطلاق خلال هذا الأسبوع، باختلاف الأسباب والدوافع، أبطال هذه القصص أشخاص عاديون، ولكن كتب لهم القدر أن تسجل أسماؤهم فى سجلات القضاء.

وترصد ' أهل مصر ' أغرب القضايا التى طرأت على محكمة هذا الأسبوع.

أمل: "دايما بيقلل مني ومن جمالي ونفسي أحس إني ست"

مبيعرفش يعمل حاجة فى حياته غير أنه ينتقدنى ويحسسنى بالنقص، ويقارنى فى الشكل بأى واحدة تانية وأنها أحلى منى، على الرغم أنى الحمد لله مش وحشة وشكلى مقبول وخريجة جامعة والكل بيشهد بأخلاقي، لكن هو بيتعمد يقلل منى، عشان يحسسنى أنه كتير عليا'.. بهذه الكلمات شكت أمل زوجها أمام محكمة الأسرة بزنانيري لرفع دعوى خلع من زوجها بعد عام ونصف فقط من الزواج، مبررة استحالة العشرة معه، بعد أن أصبحت لا تطيق تحمل أنفاسه معها على فراش زوجية واحد.

هالة: "متجوزة راديو مش بيفصل وإنسان مستفز"

فعليا إنسان مستفز، وبيتكلم كتير فى أى حاجة بشكل مبالغ فيه، لدرجة أنه بيدخل فى خصوصيات أهلى ولو روحنا زيارة لحد يحب يسأل كتير ويعرف كل تفاصيل حياتهم لدرجة انه بيحرجنى، وكأنه راديو مش بيفصل، وانا من الشخصيات اللى بتحب الهدوء والابتعاد عن خصوصيات الآخرين، ولما طلبت منه أن ننفصل بهدوء اعترض، واتكلم مع كل الناس انى طلبت كدا بس فعليا حاولت أتاقلم علي العيشة معاه مش قادرة'.. جاءت هذه الكلمات على لسان هالة وهى داخل محكمة الأسرة لرفع دعوى خلع من زوجها مبررة استحالة العشرة معه بعد 11 شهرا من الزواج فقط.

مريم: "خايفة ينتقم مني عشان أمه انصابت وهي بتضربني"

مكنش قصدى انى أوقع أمه ربنا يعلم، بس هى كانت بتضربنى جامد وهو محاولش يدافع عنى، كنت هموت فحاولت أبعدها عنى، وأنا بزقها وقعت لوراء رجلها اتكسرت ودماغها اتفتحت، أول ما شوفت المنظر أنا روحت بيتى أهلى وجوزى قعد يشتم وجرى على الدكتور، وجه بعد أسبوعين طلب انى أرجع البيت لكن رفضت وخوفت منهم ليضربونى أو ينتقم منى بسبب حبه لأمه'.. جاءت هذه الكلمات على لسان مريم وهى داخل محكمة الأسرة لرفع دعوى خلع من زوجها بعد عام من الزواج مبررة استحالة العشرة معه، لعدم شعورها بالأمان.

رشا: "كان هيموتني عشان ظبطته نايم مع زميلته على سريري"

'كنت قاعدة عند والدتي يومين عشان كانت تعبانة وقررت انى اروح الشقة أجيب حاجات، رنيت عليه أقوله لقيت تليفونه مقفول، روحت وبفتح باب لقيت صوته طالع من أوضة النوم قربت بهدوء من الأوضة لقيته هو وزميلة ليه فى الشغل بيمارسوا العلاقة، ولما صوت وكنت هفضحهم كتم نفسي، كان هيموتنى لحد ما لبست ومشيت'.. جاءت هذه الكلمات على لسان رشا وهى داخل محكمة الأسرة بزنانيري لرفع دعوى خلع من زوجها بعد 3 سنوات من الزواج، مبررة ذلك راستحالة العشرة معه بعد أن قام بخيانتها على سرير الزوجية.