محاكم الأسرة في أسبوع.. بسمة: طول الوقت سكران واتهجّم على بنتنا وهي بتستحمى.. ومصطفى: "مراتي بتخوني وضربت أمي"

شهدت محاكم الأسرة العديد من القضايا ودعاوى الخلع باختلاف الأسباب والدوافع، أبطال هذه القصص أشخاص عاديون مثلنا ولكن كتب لهم القدر ان تسجل أسماؤهم فى سجلات القضاء.

وترصد لكم ' أهل مصر' أهم هذه الدعاوى خلال أسبوع واحد فقط داخل محكمة الأسرة

بسمة تطلب الخلع: سكران طول الوقت واتهجّم على بنتنا وهي بتستحمى

'المخدرات طيرت عقله مبقاش مركز فى حاجة، لدرجة أنه استغل فرصة وجودى فى السوق أجيب طلبات، واتهجم على بنته اللى عندها ١٤ سنة وهى فى الحمام وجريت منه وهربت عند الجيران وكانت فضيحة فى المنطقة، ومش عارفة ازاى قلبه طاوعه أنه يحاول يضيع شرف بنته'.. جاءت هذه الكلمات على لسان 'بسمة' وهى داخل محكمة الأسرة لرفع دعوى خلع من زوجها بعد ١٦ سنة زواج، مبررة ذلك باستحالة العشرة معه بعد أن حاول اغتصاب ابنته.

نهى في دعوى خلع: "جوزي كسر رجلي عشان تأخرت 5 دقايق وأنا بحط الأكل"

تجلس نهى داخل محكمة الأسرة على إحدى المقاعد ترتدى عباءة سوداء وتستند على عصا فى يدها تتحامل عليها، لتنتظر دورها في الدخول إلى قاضي الأسرة لرفع دعوى خلع من زوجها بعد عام فقط من الزواج مبررة ذلك بقولها: 'من أول ما اتجوزنا وهو على طول خناق على اتفه الأسباب لدرجة كنت بترعب لما أسمع صوته جاي من الشغل كأنى اله متحركة عايز كل حاجة فى نفس اللحظة، ومش مراعى انى بعمل كل اللى فى وسعى عشان خاطره لكن هو اكتشفت أنه عايز خادمة وخلاص ويذل كمان فيها براحته'.

مصطفى لقاضي الأسرة: "مراتي بتخوني وضربت أمي"

تقدم مصطفي صاحب الـ 26 عاما من عمره، بدعوى تطليق ضد زوجته، بعد عام واحد فقط من الزوج مبررًا ذلك بقوله: 'اتجوزت عشان خاطر والدتي اللي فقدت بصرها، نتيجة تعرضها لحادث، ولكن أتت الرياح بما لا تشتهي السفن، لما أمي اكتشفت إن مراتي بتكلم راجل، وعلى علاقة غير شرعية معه، كانت نهاية والدتي الضرب رغم إعاقتها'.

ندى تطلب الخلع: مش عايز يقرب مني وحاسة بحرمان عاطفي

'من أول ما اتجوزنا وأنا دايما اللي ملهوفة عليه، لكن هو ما فيش يوم يطلبني للعلاقة للزوجية أو حتى يفاجئني بهدية أو خروجة، كنت بحس أنه مغصوب عليا، وبيقلب أي موضوع لخناقة ويقول لي أنا طبعي كده ومش هغيره، وحاسة بحرمان عاطفي'.. نطقت بهذه الكلمات 'ندى' وهي داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه.

دعاء تطلب الخلع: "أجوز عليا عرفي بعد ما وقفت جنبه واديلته فلوسي"

لما اتجوزنا واجهتنا مشاكل في الخلفة وكانت بسببه، والدكتور أكد أنه بيعاني من مشكلة هتاخر الحمل شوية، ومعترضتش ووقفت جنبه لحد ما شاء القدر إنه يعمل حادثة وتأثر على رجله ميقدرش يمشي ومحتاج عمليه، وقفت جنبه وبعت جزء ميراثي وعملته العملية ومشروع كمان، وبدل ما يرد الجميع راح اتجوز عليا عرفي'.. بهذه الكلمات تحدثت 'دعاء'، وهى داخل محكمة الأسرة لرفع دعوى خلع من زوجها بعد 4 سنوات من الزواج مبررة استحالة العشرة معه.

مريم تطلب الخلع: جوزي بيعيب على مناخيري

' طفح بى الكيل من جوزى متجوزنى وهو شايف مناخيرى ومحدش أجبره عشان يتجوزنى ويجى يتقدم ليا لحد البيت، عشان يعيب على مناخيري كل يوم، ويقارنى بكل ستات الدنيا، على الرغم أنى عمرى ما حد قال حاجة عليها وشايفة طبيعية لكن هو قليل الذوق لدرجة يقول مناخيرك كبيرة أوى، وصلنى لدرجة أني كرهت أبص فى مراية أو اقعد مع حد'، نطقت بهذه الكلمات مريم وهى داخل محكمة الأسرة لرفع دعوى خلع من زوجها بعد عام و11 شهرا .