شهدت محاكم الأسرة العديد من قضايا الخلع والطلاق خلال هذا الأسبوع، باختلاف الأسباب والدوافع، أبطال هذه القصص أشخاص عاديون ولكن كتب لهم القدر أن تسجل أسماؤهم فى سجلات القضاء.
وترصد ' أهل مصر ' أغرب القضايا التى طرأت على محكمة هذا الأسبوع.
مصطفى: "مراتي سابت البيت عشان اشتريت غسالة لأختى"
تقدم مصطفى صاحب الخمسة وثلاثين عاما، بدعوى قضائية أمام محكمة الأسرة لرفع دعوى إنذار طاعة ضد زوجته بعد ٦سنوات من الزواج مبررا ذلك بقوله: 'عمرى ما حرمتها من حاجة والحمد لله حالتنا المادية ميسورة، وربنا فرجها علينا، لكن هى عايزة كل حاجة لوحدها دايما شايفة ان أهلى مفيش لهم أى حق انى أساعدهم، وكنت بتغاضى وأساعد من غير ما أقول لها عشان ميحصلش مشاكل، لحد ما عرفت ان والدتى طلبت منى أجيب غسالة هدية لأختى حاجة محتاجاها، وكالعادة جبتها من وراها، لكن عرفت وسابت البيت غضبانة بقالها شهر وبتهددنى انها هترفع دعوى طلاق ودعوى بقائمة المنقولات الزوجية.
علا: "قالي خلي أبوكي يدفعلك مش كفاية متجوز عيانة"
' طول الوقت لما اتعب يعايرنى بمرضى حتى لو شوية سخونة، ولو طلبت منه فلوس عشان اكشف يقول لي خلى أبوكى يدفعلك مش كفاية ضحكتوا عليا واتجوزت واحدة عيانة كل شوية تشكى من مرض'، حتى والدته كانت بتشجعه أنه يعمل كدا على الرغم انى بخدمها وبشوف كل طلباتها، لحد ما زهقت من حياتى كلها ومن الذل والإهانة اللى بشوفهم'.. جاءت هذه الكلمات على لسان علا وهى داخل محكمة الأسرة لرفع دعوى خلع ضد زوجها مبررة استحالة العشرة.
نهى: "عايش في دور سي سيد وعايزنى أكون أمينة"
تقدمت نهى صاحبة الـ ٢٦ عامًا بدعوى خلع داخل محكمة الأسرة بزنانيري، لاستحالة العشرة مع زوجها، بعد عام ونصف من الزواج، مبررة ذلك بقولها: 'من أول ما اتخطبت وهو دائمًا يأمر ويتحكم فى خروجى، وكنت ببرر له تصرفاته أنها غيرة، لحد ما اتجوزنا واكتشفت إن هذه هي شخصيته، مستبد وعايز كل كلامه يمشي من غير نقاش، ولا معارضة غير طلباته الخاصة، حتى زيارة أهلى هو اللى يحدد اليوم، بقيت حاسة أنه عايش دور سي سيد، وعايزنى أكون أمينة، انفذ كل اللى يطلبه واستحمل غضبه وعصبيته طول اليوم، لدرجة أنه ممكن يحرجنى قدام أهله أوأى حد غريب عادى فى مقابل أنه يثبت أنه مسيطر عليا قدام الناس'.
أسماء: طليقته احلوت فى عينه وعايز يرجعها
لما اتقدم عشان يتجوزنى، صارحنى وقال لى إنه كان متزوج وطلق واستحالة يرجع ليها تانى، وإنه عمره ما شاف معاها يوم كويس، ودا كان اتفاقنا وإنه هيزورهم عشان يشوف بنته الصغيرة وبس، لكن بعد سنتين من زواجنا بيقول لى إنه هيرجعها ونعيش كلنا سوا عشان خاطر بنته، وحالتها النفسية ومصمم على كدا وخالف اتفاقنا.. جاءت هذه الكلمات على لسان أسماء وهى داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.
سما: "بيقول لى ذوقك وحش وبيقفلنى حتى من نفسي"
بيتعمد انه يقلل منى فى كل حاجة، وعنده عقدة نقص لدرجة انه مصر يحسننى انى أقل منه فى كل حاجة فى الفهم طريقة التعامل مع الناس، ومش بعرف أختار حاجة، وطول الوقت يقول لي على أى حاجة بشتريها ذوقك وحش، حتى هدومى الداخلية على الرغم أنى لما بشترى حاجة بأخد رأى مامته أو أى حد من أهلى بيقولوا ان ذوقها جميل، بقي يتعمد يقفلنى من كل حاجة لحد من قفلت من نفسي، وشكلى بسببه'.. نطقت بهذه الكلمات سما وهى داخل محكمة الأسرة لرفع دعوى خلع من زوجها بعد عام ونصف من الزواط مبررة ذلك باستحالة العشرة معه.
تابعوا آخر أهل مصر على Google News
