"مش مجرد ماس كهربائي ولا شوية دخان".. خبير تكنولوجيا يوضح أسباب تأثر شبكات الاتصالات بـ حريق سنترال رمسيس

كشف الدكتور شحاته السيد، خبير تكنولوجيا المعلومات أسباب تأثر شبكات الاتصالات بـ حريق سنترال رمسيس، وبعض الخدمات المالية".

وقال "السيد": "إيه اللي حصل في سنترال رمسيس.. وليه الدنيا وقعت بالشكل ده.

اللي حصل في حريق سنترال رمسيس مش مجرد ماس كهربائي ولا شوية دخان؛ لأن المكان ده مش سنترال عادي. ده حرفيًا قلب الشبكة في مصر، واللي بيعرف شبكات كويس عارف إن أي بلد عندها Nodes رئيسية اسمها Core Nodes، بتبقى زي الشرايين اللي بتمر فيها كل أنواع الترافيك، سواء مكالمات أو إنترنت أو بيانات بنوك أو حتى إشارات الطوارئ.. سنترال رمسيس بالذات بيعدّي منه نسبة ضخمة من الترافيك الدولي والمحلي؛ لأنه مربوط بكابلات الألياف الضوئية اللي جاية من البحر الأحمر والمتوسط، وكمان مربوط بكل السنترالات الفرعية في القاهرة والجيزة. وده معناه إن أي مشكلة فيه هتتسلسل فورًا لباقي الشبكة".

وخلال منشور على صفحته بفيس بوك تابع السيد: "اللي زاد الطين بلة إن السنترال مش بس بيشيل اتصالات أرضية، لكنه كمان بيتحكم في جزء من تحويل مكالمات المحمول، وبيبقى بوابة مهمة للإنترنت الدولي، ولخدمات زي إنستاباي والدفع الإلكتروني، اللي بتشتغل على قنوات VPN أو IPSec Tunnels ومربوطة بالبنك المركزي والبنوك الخاصة.. ولما حصل الحريق، بدأ في غرفة الكهرباء اللي فيها المحولات الكبيرة واللوحات الرئيسية. والدخان دخل على الأجهزة الحساسة اللي شغالة بالفايبر، زي الـ ODF والـ Optical Transceivers، وده أخطر من النار نفسها؛ لأن الدخان فيه جسيمات بتسد مسارات الليزر جوة الفايبر، ولو اتسدت مفيش إشارة ضوئية هتعدّي، يعني Loss of Signal. والأجهزة ساعات بتقفل نفسها لحماية الليزر جوة الترانسيفر من الضرر.. ولما فرق الإطفاء اضطرت تفصل الكهرباء بالكامل، اتحرمت الأجهزة من الطاقة، واشتغلت الـ UPS شوية بس، لكنها كانت مصممة تشيل الحمل لدقايق مش لساعات. ولما الـ UPS وقع، كله اتطفى مرة واحدة. ودي أكبر مشكلة؛ لأن كل الـ Routing Tables اتحذفت من الـ Core Switches. ولما الكهرباء رجعت، الأجهزة خدت وقت طويل عشان تعمل Boot وتحمّل الـ Configurations من جديد".

وأكمل: "أي مهندس شبكات عارف إن أجهزة الـ Core مش مجرد بتشتغل وتعدّي الترافيك وخلاص؛ دي بتعمل Signaling زي SS7 أو SIP عشان تدير المكالمات، خصوصًا أرقام الطوارئ والـ PRI Circuits اللي وقعوا تمامًا.. عشان كده الناس مقدرتش توصل للشرطة أو الإسعاف، ولا حتى الخطوط الساخنة لشركات الغاز أو المياه.. وكمان اللي زاد الأزمة إن المسارات البديلة، اللي المفروض تتحمل الترافيك وقت الكوارث، ماقدرتش تستحمل الضغط كله؛ لأنها أقل في السعة ومش معمولة تشتغل كـ Active-Active طول الوقت، بل Active-Standby. وأحيانًا كتير بتكون الأجهزة قديمة ولا تدعم Auto Failover، وبتحتاج تدخل يدوي، وده أخد وقت أطول جدًا في التحويل والتعديل".

وواصل: "ده ليه تأثير مدمر في الخدمات المالية؛ لأن البنوك شغالة على شبكة مؤمنة جدًا، وأي انقطاع ولو ثواني بيعطّل الـ APIs اللي بتعمل مصادقة على المعاملات. وده اللي وقف إنستاباي وخلّى أجهزة الـ ATM تعلّق وماتقدرش تعمل أي عمليات، خصوصًا إن في مصر جزء كبير من شبكات البنوك بيمر فعليًا عبر وصلات من رمسيس.. وكل دي تفاصيل الناس العادية مبتاخدش بالها منها، بس دي اللي بتفسر ليه بلد كاملة شبه وقفت بسبب حريق في مبنى واحد. واللي لازم الناس تفهمه إن أكبر درس في اللي حصل إن الاعتماد على نقطة واحدة اسمه Single Point of Failure، ودي مشكلة تصميمية لازم تتعالج ببنية شبكة Mesh مش مجرد Star. ولازم الـ Redundancy تبقى بنفس سعة الخط الرئيسي، مش مجرد Backup على الورق.. وأهم حاجة إن لازم كل شبكة يكون عندها Plan B تشتغل تلقائي من غير ما حد يوقف يعدّل Configurations وقت الأزمة؛ لأن في عالم الشبكات الدقيقة بتفرق، ولو كان عندنا شبكة موزعة Distributed بشكل أكبر، ماكنّاش هنشوف التوقف الكامل ده، ولا كل القطاعات الحيوية تقع مرة واحدة".

واختتم: "أوضح لحضراتكم الصورة بشكل أدق علشان مايبقاش فيه التباس. الشبكة في مصر مش Star خالصة ومش Mesh خالصة هي أقرب لحاجة اسمها Hierarchical Star أو Partial Mesh ودي بتجمع بين الشكلين مع بعض.. يعني إيه؟.. يعني فيه فعليًا وصلات ربط جانبية بين السنترالات وبعضها (وده اللي بنسميه Mesh Links) لكن الترافيك الأساسي بيعدي من نقاط مركزية زي سنترال رمسيس اللي بيشتغل كمحور رئيسي Core Node بيجمع حواليه أغلب الدوائر الأساسية وده اللي بيخلي أي عطل فيه يأثر بشكل دومينو على باقي الشبكة.. ولو كانت الشبكة Full Mesh فعليًا، ماكنّاش شفنا الانقطاع الكبير ده اللي حصل وقت حريق رمسيس؛ لأن الترافيك كان هيتحوّل تلقائي بين المسارات البديلة من غير تأثير بنفس الحجم. المشكلة إن المسارات البديلة موجودة لكن سعتها أقل ومش معمولة تتحمل نفس حجم الترافيك وقت الأزمات، وده بيخلي الشبكة في الحقيقة شبه مركزية أكتر من إنها Mesh خالصة.. يعني تقدر تقول إن شبكة مصر Hybrid فيها جزء Star وجزء Mesh، لكن لسه الجانب المركزي فيها قوي جدًا، وده اللي عمل الأزمة الأخيرة.

@إشارة إن شاء الله تعدي على خير وناخد بالنا ونبدأ نشتغل تأسيس صح بعد كده".